ಆ್ಯಶಸ್​ ಟೆಸ್ಟ್‌ಗೆ ಮತ್ತೆ ಕೋವಿಡ್​ ಭೀತಿ

ಮೆಲ್ಬೋರ್ನ್​: ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಆ್ಯಶಸ್​ ಟೆಸ್ಟ್​ ಕ್ರಿಕೆಟ್​​ ಸರಣಿಗೆ ಮತ್ತೊಮ್ಮೆ ಕೋವಿಡ್​ ಭೀತಿ ಎದುರಾಗಿದೆ. ಕಾಂಗರೂ ಪಡೆಯ ಮಧ್ಯಮ ಕ್ರಮಾಂಕದ ಬ್ಯಾಟರ್ ಟ್ರಾವಿಸ್​ ಹೆಡ್​ಗೆ ಕೊರೊನಾ ತಗುಲಿರುವುದು ದೃಢಪಟ್ಟಿದ್ದು, ಸಿಡ್ನಿ ಟೆಸ್ಟ್​ ಪಂದ್ಯದಿಂದ ಹೊರಗುಳಿಯಲಿದ್ದಾರೆ.

ಈ ಬಗ್ಗೆ ಟ್ವೀಟ್​ ಮಾಡಿರುವ ಕ್ರಿಕೆಟ್​ ಆಸ್ಟ್ರೇಲಿಯಾ, ಪಿಸಿಆರ್ ಪರೀಕ್ಷೆಯಲ್ಲಿ ಆಸ್ಟ್ರೇಲಿಯಾದ ಬ್ಯಾಟರ್ ಟ್ರಾವಿಸ್ ಹೆಡ್​ಗೆ ಕೋವಿಡ್ -19 ಪಾಸಿಟಿವ್​ ದೃಢಪಟ್ಟಿದೆ. ಮುಂಜಾಗ್ರತಾ ಕ್ರಮವಾಗಿ ಮಿಚೆಲ್ ಮಾರ್ಷ್, ನಿಕ್ ಮ್ಯಾಡಿನ್ಸನ್ ಮತ್ತು ಜೋಶ್ ಇಂಗ್ಲಿಸ್ ಅವರು ಹೆಚ್ಚುವರಿ ಆಟಗಾರರಾಗಿ ಆಸ್ಟ್ರೇಲಿಯಾ ತಂಡವನ್ನು ಸೇರಿಕೊಂಡಿದ್ದಾರೆ ಎಂದು ತಿಳಿಸಿದೆ.

ಈ ಹಿಂದೆ ಸರಣಿಯ ಮೆಲ್ಬೋರ್ನ್​ ಟೆಸ್ಟ್ ಪಂದ್ಯದಲ್ಲೂ ಕೋವಿಡ್​ ಭಯ ಆವರಿಸಿತ್ತು. ಪಂದ್ಯದ ಟೆಸ್ಟ್​ ಪಂದ್ಯದ ಎರಡನೇ ದಿನದಾಟದ ಆರಂಭಕ್ಕೂ ಮುನ್ನ ಆಂಗ್ಲರ ಕ್ಯಾಂಪ್​ನಲ್ಲಿ ನಾಲ್ವರಿಗೆ ಕೋವಿಡ್​ ಪಾಸಿಟಿವ್​ ದೃಢಪಟ್ಟಿತ್ತು. ಆಂಗ್ಲರ ಕ್ಯಾಂಪ್​ನ ಇಬ್ಬರು ಸಹಾಯಕ ಸಿಬ್ಬಂದಿ ಮತ್ತು ಇಬ್ಬರು ಕುಟುಂಬ ಸದಸ್ಯರಿಗೆ ಕೋವಿಡ್​ ತಗುಲಿತ್ತು. ಬಳಿಕ ಸಕಲ ಮುನ್ನೆಚ್ಚರಿಕೆಯೊಂದಿಗೆ ಪಂದ್ಯವನ್ನು ನಡೆಸಲಾಗಿತ್ತು.

ಹೆಚ್ಚಿನ ಅಪಾಯ ತಪ್ಪಿಸುವ ನಿಟ್ಟಿನಲ್ಲಿ ಇಂಗ್ಲೆಂಡ್ ತಂಡವು ಪ್ರತ್ಯೇಕವಾಗಿ ಸಿಡ್ನಿಗೆ ಪ್ರಯಾಣಿಸುತ್ತಿದೆ. ತಮ್ಮ ಕುಟುಂಬದ ಸದಸ್ಯರೊಬ್ಬರಿಗೆ ಕೋವಿಡ್​ ತಗುಲಿರುವ ಕಾರಣ ಇಂಗ್ಲೆಂಡ್​ ತರಬೇತುದಾರ ಕ್ರಿಸ್ ಸಿಲ್ವರ್‌ವುಡ್ ಸಿಡ್ನಿ ಟೆಸ್ಟ್​ ಸಂದರ್ಭದಲ್ಲಿ ತಂಡದಿಂದ ದೂರವಿರಲಿದ್ದಾರೆ. ಅವರು ಮೆಲ್ಬೋರ್ನ್‌ನಲ್ಲಿ ಪ್ರತ್ಯೇಕವಾಗಿ ಉಳಿದುಕೊಳ್ಳಲಿದ್ದಾರೆ. ಇದುವರೆಗೆ ಇಂಗ್ಲೆಂಡ್ ತಂಡದ ಸಿಬ್ಬಂದಿ ಸೇರಿ ಒಟ್ಟೂ 7 ಮಂದಿಗೆ ವೈರಸ್​ ತಗುಲಿದೆ.

ಇನ್ನೊಂದೆಡೆ, ಐಸಿಸಿ ಮ್ಯಾಚ್ ರೆಫರಿ ಡೇವಿಡ್ ಬೂನ್​ಗೆ ಕೂಡ ಪಾಸಿಟಿವ್​ ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ ಅವರು ಸಿಡ್ನಿ ಟೆಸ್ಟ್​ನಿಂದ ಹೊರಗುಳಿಯಲಿದ್ದು, ನ್ಯೂ ಸೌತ್ ವೇಲ್ಸ್ ಮೂಲದ ಸ್ಟೀವ್ ಬರ್ನಾರ್ಡ್ ರೆಫರಿ ಆಗಿ ಕಾರ್ಯ ನಿರ್ವಹಿಸಲಿದ್ದಾರೆ.