ರಾಹುಲ್​ ಗಾಂಧಿ ಸಭೆಗೆ ವಿರೋಧ: ವಿದ್ಯಾರ್ಥಿಗಳ ನಡುವೆ ಗಲಾಟೆ

ಹೈದ್ರಾಬಾದ್​​ (ತೆಲಂಗಾಣ): ಕಾಂಗ್ರೆಸ್​​ ನಾಯಕ ರಾಹುಲ್​ ಗಾಂಧಿ ಮೇ 6 ಮತ್ತು 7ರಂದು ಎರಡು ದಿನಗಳ ತೆಲಂಗಾಣದ ಪ್ರವಾಸ ಕೈಗೊಂಡಿದ್ದಾರೆ. ಮೇ 7ರಂದು ರಾಜಧಾನಿ ಹೈದ್ರಾಬಾದ್​ನ ಉಸ್ಮಾನಿಯಾ ವಿಶ್ವವಿದ್ಯಾಲಯದಲ್ಲಿ ರಾಹುಲ್​ ಸಭೆ ಆಯೋಜಿಸಲು ಕಾಂಗ್ರೆಸ್​​ ಮುಖಂಡರು ಮುಂದಾಗಿದ್ದಾರೆ. ಈಗ ಇದೇ ವಿಷಯವು ವಿವಾದಕ್ಕೆ ಕಾರಣವಾಗಿದ್ದು, ವಿದ್ಯಾರ್ಥಿ ಗುಂಪುಗಳ ನಡುವೆ ಗಲಾಟೆ ಸಹ ನಡೆದಿದೆ.

ಮೇ 6ರಂದು ಹನಮಕೊಂಡಕ್ಕೆ ಭೇಟ ನೀಡಲಿರುವ ರಾಹುಲ್​ ಗಾಂಧಿ ಸಾರ್ವಜನಿಕರನ್ನುದ್ದೇಶಿಸಿ ಮಾತನಾಡಲಿದ್ದಾರೆ. ಮರು ದಿನ ಉಸ್ಮಾನಿಯಾ ವಿಶ್ವವಿದ್ಯಾಲಯದಲ್ಲಿ ವಿದ್ಯಾರ್ಥಿಗಳೊಂದಿಗೆ ಸಂವಾದ ಏರ್ಪಡಿಸಲು ನಿರ್ಧರಿಸಲಾಗಿದೆ. ಇದಕ್ಕೆ ಅನುಮತಿ ನೀಡುವಂತೆ ಕಾಂಗ್ರೆಸ್​ ಮುಖಂಡರು ಮನವಿ ಮಾಡಿದ್ದಾರೆ. ತೆಲಂಗಾಣ ಪ್ರತ್ಯೇಕ ರಚನೆ ಹೋರಾಟದಲ್ಲಿ ಉಸ್ಮಾನಿಯಾ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳ ಹೋರಾಟ ಮಹತ್ವದ್ದಾಗಿದೆ. ಹಲವು ವಿದ್ಯಾರ್ಥಿಗಳು ಪ್ರಾಣ ತ್ಯಾಗ ಮಾಡಿದ್ದಾರೆ. ಈ ವಿದ್ಯಾರ್ಥಿಗಳ ಹೋರಾಟದಿಂದ ಕಾಂಗ್ರೆಸ್​ ತೆಲಂಗಾಣ ಪ್ರತ್ಯೇಕ ರಾಜ್ಯವನ್ನು ರಚಿಸಿದೆ ಎಂದು ಮಾಜಿ ಸಂಸದ ಹನುಮಂತರಾವ್​ ಹೇಳಿದ್ದಾರೆ.

ಎಬಿವಿಪಿ-ಟಿಆರ್​ಎಸ್​​ವಿ ವಿರೋಧ: ವಿಶ್ವವಿದ್ಯಾಲಯದಲ್ಲಿ ರಾಹುಲ್​ ಗಾಂಧಿ ಕಾರ್ಯಕ್ರಮ ಆಯೋಜನೆಗೆ ಟಿಆರ್​ಎಸ್​ ವಿದ್ಯಾರ್ಥಿ ವಿಭಾಗ ಮತ್ತು ಎಬಿವಿಪಿ ವಿರೋಧ ವ್ಯಕ್ತಪಡಿಸಿವೆ. ರಾಜಕೀಯ ಕಾರ್ಯಕ್ರಮಕ್ಕೆ ಅವಕಾಶ ಕೊಟ್ಟರೆ ಶೈಕ್ಷಣಿಕ ವಾತಾವರಣಕ್ಕೆ ತೊಂದರೆ ಆಗುತ್ತಿದೆ ಎಂದು ಈ ಗುಂಪುಗಳು ಆಕ್ಷೇಪ ವ್ಯಕ್ತಪಡಿಸಿವೆ. ಕ್ಯಾಂಪಸ್​​ಗೆ ರಾಹುಲ್​ ಪ್ರವೇಶಿಸಲು ಅನುಮತಿ ನೀಡಬಾರದು ಎಂದೂ ಆಡಳಿತ ಮಂಡಳಿಗೆ ಮನವಿ ಸಲ್ಲಿಸಲಾಗಿದೆ.

ಅಡಕತ್ತರಿಯಲ್ಲಿ ಆಡಳಿತ ಮಂಡಳಿ: ಇತ್ತ, ವಿರೋಧ ಮತ್ತು ಪರ ಚರ್ಚೆಯಿಂದ ವಿವಿಯ ಆಡಳಿತ ಮಂಡಳಿ ಅಡಕತ್ತರಿಯಲ್ಲಿ ಸಿಲುಕಿದೆ. ಅಲ್ಲದೇ, ಅದೇ ದಿನ ವಿವಿಯ ಎನ್​ಜಿಒ ಚುನಾವಣೆ ಸಹ ನಿಗದಿಯಾಗಿದೆ. ಆದ್ದರಿಂದ ಕುಲಪತಿ ಡಾ.ರವೀಂದ್ರ ಯಾದವ್​ ಅಧಿಕೃತವಾಗಿ ಇದುವರೆಗೆ ಯಾವುದೇ ಮಾಹಿತಿ ನೀಡಿಲ್ಲ.

Related ಸುದ್ದಿ